“Sempre están no mesmo sitio”
Redacción/Santiago de Compostela
22/03/09
É un problema que afecta a todas pero, a algunhas en maior medida que outras. As asociacións de Veciños de Santiago de Compostela recoñecen que na maioría dos barrios existen puntos de mendicidade moi localizados aínda que case nunca supoñen un problema para os cidadáns que poboan os barrios da capital galega. “Sempre están no mesmo sitio. Por exemplo, no noso barrio existen puntos moi localizados onde, durante este inverno, se asentaron os mendigos: nestes últimos meses houbo un home pedindo na porta dun dos supermercados da rúa Basquiños e, ademais, outro home estranxeiro que vagaba pola rúa San Roque. Pero é xente que vai ao seu e non fai mal a ninguén”, comenta Xosé Martínez Otero, presidente da asociación veciñal Francisco Asorei. E é que as portas dos supermercados supoñen un dos lugares nos que máis se asentan os sen teito para pedir esmola durante o día.
Pero o que si recoñece o voceiro desta asociación é a presenza dunha familia que, aínda que reside no barrio, trasládase tódolos días ata a zona vella para pedir esmola: “Sabemos que sempre, algún membro desta familia, sitúase nas portas da catedral para pedir”, afirma. Ao igual que esta familia, moitos son os que escollen as rúas da cidade vella e os seus edificios sagrados para buscar a solidariedade da xente: “Dende a miña casa ata a facultade atópome na rúa do Franco e na catedral entre dous e tres mendigos”, explica Marcos García, un estudante de Mediciña. “Pero se te cadra de pasear pola praza da Quintana ou pola rúa do Toural, probablemente atopes moitos máis”, engade. E é que moitos mendigos apelan á caridade do turista para buscar o sustento de cada día.
